ການສະໜັບສະໜູນຂອງສະຫະພາບເອີຣົບ ໄດ້ເນັ້ນໃຫ້ເຫັນເຖິງທັດສະນະຂອງໄວໜຸ່ມ ກ່ຽວກັບ ພະຍາດ COVID-19 ແລະ ການສັກວັກຊີນປ້ອງກັນພະຍາດດັ່ງກ່າວ

ໂດຍທົ່ວໄປແລ້ວ, ໄວໜຸ່ມໃນ ສປປ ລາວ ມີຄວາມເຂົ້າໃຈ ກ່ຽວກັບອາການຂອງພະຍາດ COVID-19 ແລະ ພຶດຕິກໍາໃນການຮັກສາສຸຂະພາບ ເປັນຢ່າງດີ, ແຕ່ບາງຄົນບໍ່ເຊື່ອວ່າພະຍາດ COVID-19 ມີຄວາມອັນຕະລາຍເຖິງຂັ້ນເສຍຊີວິດໄດ້, ອີງຕາມຜົນສຳຫຼວດ ໂດຍກະຊວງສາທາລະນະສຸກ ແລະ ອົງການອະນາໄມໂລກ ໂດຍໄດ້ຮັບການສະໜັບສະໜູນຈາກສະຫະພາບເອີຣົບ (EU).

ໄວໜຸ່ມຄົນໜຶ່ງໃນນະຄອນຫຼວງວຽງຈັນ ໄດ້ກ່າວວ່າ: “ຂ້ອຍບໍ່ຢ້ານພະຍາດ COVID-19 ເພາະວ່າເຮົາສາມາດເຊົາໄດ້. ຫຼາຍຄົນມີຄວາມຢ້ານຢູ່, ແຕ່ກໍຍັງຢາກອອກໄປນອກຢູ່."

ເຖິງຢ່າງໃດກໍຕາມ, ການຄົ້ນຄວ້າດັ່ງກ່າວ ໄດ້ສະແດງໃຫ້ເຫັນວ່າ ຊາວໜຸ່ມສ່ວນຫຼາຍມີຄວາມຮູ້ກ່ຽວກັບພະຍາດ COVID-19 ເປັນຢ່າງດີ. ໃນນັ້ນ, ເກືອບໝົດທຸກຄົນຮູ້ວ່າ ຖ້າເຂົາເຈົ້າມີອາການ ຄວນແຍກປ່ຽວຢູ່ເຮືອນ ແລະ ສ່ວນໃຫຍ່ສາມາດບອກອາການທົ່ວໄປຂອງພະຍາດ COVID-19 ໄດ້.

ດຣ ພອນປະເສີດ ອຸນາພົມ, ຫົວໜ້າກົມອະນາໄມ ແລະ ສົ່ງເສີມສຸຂະພາບ, ກະຊວງສາທາລະນະສຸກ ໄດ້ກ່າວວ່າ: "ຜົນການສໍາຫຼວດເຫຼົ່ານີ້ ເປັນສິ່ງເຕືອນໃຈວ່າ ບໍ່ມີໃຜທີ່ບໍ່ຮູ້ຫຍັງເລີຍ ກ່ຽວກັບພະຍາດ COVID-19.  ເຖິງວ່າໄພຂົ່ມຂູ່ຂອງພະຍາດ  COVID-19 ມີທ່າອ່ຽງຫຼຸດລົງແລ້ວ, ແຕ່ພະຍາດ COVID-19 ຍັງຢູ່ອ້ອມຕົວເຮົາ, ຍັງສາມາດແຜ່ລະບາດ ແລະ ຍັງເຮັດໃຫ້ພວກເຮົາເຈັບປ່ວຍໄດ້ຢູ່."

"ນອກຈາກນັ້ນ, ພວກເຮົາຍັງຄົງມີຄວາມສ່ຽງແຜ່ເຊື້ອໄວຣັສໄປຍັງຜູ້ທີ່ບໍ່ໄດ້ຮັບການປ້ອງກັນຢ່າງເຕັມທີ່ ກໍຄື ຜູ້ທີ່ຍັງບໍ່ທັນໄດ້ສັກວັກຊີນເຂັມພື້ນຖານ ແລະ ເຂັມກະຕຸ້ນ. ສຳລັບຜູ້ສູງອາຍຸ ຫຼື ຜູ້ທີ່ມີບັນຫາທາງສຸຂະພາບຮ້າຍແຮງ ມີຄວາມສ່ຽງເສຍຊີວິດຈາກການຕິດເຊື້ອ COVID-19 ຖ້າບໍ່ໄດ້ສັກວັກຊີນ. ຖ້າທ່ານຮູ້ສຶກບໍ່ສະບາຍ ແລະ ຕ້ອງການການປິ່ນປົວ, ໃຫ້ຕິດຕໍ່ພົວພັນກັບສະຖານທີ່ບໍລິການສາທາລະນະສຸກ."

ປັດຈຸ​ບັນ, ປະຊາຊົນ 75% ​ໄດ້​ຮັບ​ວັກຊີນປ້ອງ​ກັນ​ພະຍາດ​ COVID-19 ຄົບໂດຍພື້ນຖານ. ແຕ່ຢ່າງໃດກໍຕາມ, ໃນກຸ່ມຜູ້ສູງອາຍຸ ເຊິ່ງຖືວ່າເປັນຜູ້ທີ່ມີຄວາມສ່ຽງສູງທີ່ສຸດທີ່ຈະຕິດເຊື້ອພະຍາດ COVID-19 ມີພຽງແຕ່ 1 ສ່ວນ 4 ເທົ່ານັ້ນທີ່ໄດ້ຮັບວັກຊີນປ້ອງກັນພະຍາດ COVID-19 ເຂັມກະຕຸ້ນ.

ການ​​ສໍາຫຼວດຄັ້ງນີ້ ໄດ້​ດຳ​ເນີນ​ຢູ່​ນະຄອນຫຼວງ​ວຽງ​ຈັນ, ​ແຂວງ​ຊຽງ​ຂວາງ, ສະ​ຫວັນ​ນະ​ເຂດ ​ແລະ ຄຳ​ມ່ວນ. ເຊິ່ງໄດ້ສຳຫຼວດຄວາມ​ຄິດ​ເຫັນ​ຂອງ​ໄວ​ໜຸ່ມ​ຫຼາຍ​ກວ່າ 200 ຄົນ ​ກ່ຽວ​ກັບ​ ພະຍາດ COVID-19 ແລະ ​ການ​ສັກ​ວັກຊີນ.

ຂໍ້ດີ ເຫັນວ່າ ໄວໜຸ່ມສ່ວນຫຼາຍ ແມ່ນມີຄວາມຍິນດີທີ່ຈະໄປສັກວັກຊີນປ້ອງກັນພະຍາດ COVID-19 ເຂັມກະຕຸ້ນ, ແຕ່ວ່າຄວາມຮັບຮູ້ຕໍ່ກັບວັກຊີນເຂັມກະຕຸ້ນ ແລະ ຜົນປະໂຫຍດຂອງມັນ ແມ່ນຕໍ່າກວ່າຄວາມຮັບຮູ້ຕໍ່ກັບວັກຊີນປ້ອງກັນພະຍາດ COVID-19 ເຂັມພື້ນຖານ. ເຫດຜົນທີ່ເຮັດໃຫ້ຄົນເລືອກບໍ່ໄປສັກວັກຊີນ ມີສອງເຫດຜົນຫຼັກ ເຊິ່ງກວມເອົາສັດສ່ວນເທົ່າໆກັນ ກໍຄື 'ສ່ວນຫຼາຍແມ່ນຢູ່ແຕ່ເຮືອນ' ແລະ ຄວາມກັງວົນ ກ່ຽວກັບພະຍາດປະຈຳຕົວ ຫຼື ຜົນຂ້າງຄຽງຂອງວັກຊີນ. 

ທ່ານ ດຣ Nyambat  Batmunkh, ຫົວຫນ້າທີມໂຄງການການສັກຢາປ້ອງກັນພະຍາດ ຂອງອົງການອະນາໄມໂລກ ໄດ້ກ່າວວ່າ: "ການສຳຫຼວດນີ້ ໄດ້ສະແດງໃຫ້ເຫັນເຖິງທັດສະນະທີ່ສໍາຄັນ ກ່ຽວກັບ ສຸຂະພາບ ແລະ ຊ່ວຍຊີ້ນໍາແນວທາງການເຄື່ອນໄຫວວຽກງານຂອງກະຊວງສາທາລະນະສຸກ, ຄູ່ຮ່ວມພັດທະນາ ເຊັ່ນ ສະຫະພາບເອີຣົບ ແລະ ພາກສ່ວນອື່ນໆ ໃນການປິດຊ່ອງວ່າງທີ່ເປັນອຸປະສັກໃນການສັກວັກຊີນປ້ອງກັນພະຍາດ COVID-19."

“ນອກຈາກນີ້, ຍັງເປັນສິ່ງເຕືອນໃຈອັນສຳຄັນ ສໍາລັບພວກເຮົາທຸກຄົນໃນຂະແໜງສາທາລະນະສຸກວ່າພວກເຮົາຕ້ອງສືບຕໍ່ພະຍາຍາມໃຫ້ຄວາມຮູ້ ແລະ ເຂົ້າເຖິງກຸ່ມຄົນທີ່ຢູ່ຫ່າງໄກສອກຫຼີກ; ໃຫ້ເຮົາຄຳນຶງສະເໝີວ່າ ພວກເຮົາຍັງບໍ່ປອດໄພ ຈົນກວ່າທຸກຄົນຈະປອດໄພ.”

ການສໍາຫຼວດຄັ້ງນີ້ ໄດ້ດໍາເນີນການສົນທະນາເປັນກຸ່ມເປົ້າໝາຍໃນຊຸມຊົນຫຼາຍແຫ່ງ, ເຊິ່ງໄດ້ມີການສໍາພາດກຸ່ມນັກສຶກສາ ອາຍຸ 15-29 ປີ, ຄູອາຈານ, ລັດຖະກອນ, ຊາວກະສິກອນ, ບຸກຄະລາກອນການແພດ, ຕໍາຫຼວດ ແລະ ອື່ນໆ.

ທ່ານ​ ນາງ Ina Marciulionyte, ​ເອກ​ອັກຄະ​ລັດຖະທູດ ສະຫະພາບເອີຣົບ ໄດ້ເນັ້ນເຖິງການສະໜັບສະໜູນວ່າ: “ສະຫະພາບເອີຣົບ ມີຄວາມມຸ່ງໝັ້ນ​ໃນການປົກ​ປ້ອງ​ສຸຂະພາບໃນ ສປປ ລາວ ​ແລະ ໃນການຊ່ວຍສ້າງໃຫ້ ສປປ ລາວໃຫ້​ເຂັ້ມແຂງ​ຂຶ້ນນັບມື້ ​ພາຍຫຼັງ​ການລະບາດຂອງພະຍາດ COVID-19. ເຖິງວ່າການຄົ້ນຄວ້ານີ້ ຈະມີຂະໜາດນ້ອຍ ແຕ່ກໍເປັນຜົນງານທີ່ມີຄວາມສໍາຄັນຕໍ່ກັບການປົກປ້ອງຊຸມຊົນ ແລະ ເປັນຂໍ້ມູນທີ່ສາມາດນຳໃຊ້ເຂົ້າໃນວຽກງານການຕອບໂຕ້ການລະບາດ ອີກດ້ວຍ.

ວຽກງານດັ່ງກ່າວ ເປັນສ່ວນໜຶ່ງຂອງການຮ່ວມມື ລະຫວ່າງ ສະຫະພາບເອີຣົບ ແລະ ອົງການອະນາໄມໂລກ ໃນການສະໜັບສະໜູນວຽກງານສາທາລະນະສຸກໃນ ສປປ ລາວ ເຊິ່ງລວມມີກິດຈະກຳທີ່ຕິດພັນກັບພະຍາດ COVID-19 ເຊິ່ງເນັ້ນໃສ່ການຍົກສູງສຸຂະພາບ ແລະ  ຊີວິດການເປັນຢູ່ຂອງປະຊາຊົນ ແລະ ຊຸມຊົນ ປະກອບມີການສະໜັບສະໜູນວຽກງານການວິເຄາະ ແລະ ການເຝົ້າລະວັງພະຍາດ, ການຕອບໂຕ້ເຫດການສຸກເສີນດ້ານສາທາລະນະສຸກ, ການປັບປຸງການຄຸ້ມຄອງການປິ່ນປົວ, ການຄວບຄຸມ ແລະ ປ້ອງກັນການຕິດເຊື້ອ, ການປັບປຸງນໍ້າສະອາດ, ສຸຂາພິບານ ແລະ ສຸຂະອະນາໄມ ແລະ ການຊ່ວຍເຫຼືອໃນການຈັດຕັ້ງປະຕິບັດວຽກງານຕ່າງໆ ອີກດ້ວຍ.