ເດັກຍິງ ແລະ ໄວໜຸ່ມຍິງທຸກຄົນ ອາຍຸລະຫວ່າງ 10 ຫາລຸ່ມ 17 ປີ ຈະໄດ້ຮັບການປ້ອງກັນຈາກໄວຣັດສ໌ HPV ຊຶ່ງເປັນສາເຫດຫຼັກທີ່ພາໃຫ້ເກີດມະເຮັງປາກມົດລູກ ໃນຂະບວນການສັກວັກຊີນກັນມະເຮັງປາກມົດລູກ ຢູ່ໃນໂຮງຮຽນຂອງທຸກແຫ່ງໃນ ສປປ ລາວ ໃນໄລຍະເດືອນກັນຍາປີ 2023.
ມະເຮັງປາກມົດລູກເປັນ ມະເຮັງທີ່ພົບເຫັນຫຼາຍທີ່ສຸດເປັນອັນດັບສອງ ສໍາລັບມະເຮັງທີ່ເກີດໃນແມ່ຍິງ ໃນ ສປປ ລາວ ແລະ ມະເຮັງປາກມົດລູກ 99.7% ແມ່ນເກີດຈາກເຊື້ອໄວຣັດສ໌ HPV. ເພື່ອແກ້ໄຂບັນຫາດັ່ງກ່າວ, ລັດຖະບານແຫ່ງ ສປປ ລາວ ໄດ້ຮັບການສະໜັບສະໜູນຈາກກອງທຶນກາວີ ໂດຍຜ່ານອົງການອະນາໄມໂລກ ແລະ ອົງການ ຢູນິເຊັບ ໄດ້ນຳເຂົ້າວັກຊີນກັນມະເຮັງປາກມົດລູກ ແລະ ໃຫ້ບໍລິການທົ່ວປະເທດເລີ່ມແຕ່ປີ 2020 ຊຶ່ງຄວາມຄືບໜ້າຂອງຂະບວນການດັ່ງກ່າວຄືເດັກຍິງ ອາຍຸ 12-16 ປີ ຫຼາຍກວ່າ 90% ໃນ ສປປ ລາວ ໄດ້ຮັບວັກຊີນກັນມະເຮັງປາກມົດລູກແລ້ວຢ່າງໜ້ອຍໜຶ່ງຄັ້ງ.
ທ່ານ ດຣ ພອນປະເສີດ ອຸນາພົມ, ຫົວໜ້າກົມອະນາໄມ ແລະ ສົ່ງເສີມສຸຂະພາບ, ກະຊວງສາທາລະນະສຸກໄດ້ ກ່າວວ່າ: “ຂະບວນການໃຫ້ວັກຊີນຄັ້ງນີ້ ເປັນຂີດໝາຍອັນໜຶ່ງ ໃນການສົ່ງເສີມສຸຂະພາບຂອງເດັກຍິງ ແລະ ໄວໜຸ່ມ ໃນ ສປປ ລາວ. ວັກຊີນ ຊະນິດນີ້ ສາມາດປ້ອງກັນເດັກຍິງຈາກ ມະເຮັງປາກມົດລູກ ແລະ ຂ້ອຍຮູ້ສຶກພູມໃຈ ທີ່ໄດ້ເຫັນເດັກຍິງ ແລະ ໄວໜຸ່ມລາວ ໄດ້ຮັບວັກຊີນກັນມະເຮັງປາກມົດລູກ ໃນສາມປີຜ່ານມາ."
ທ່ານ ດຣ ສຸລິຍາ ຈັນນາວົງ, ຮັກສາການຫົວໜ້າທີມວັກຊີນ, ອົງການອະນາໄມໂລກ ປະຈຳ ສປປ ລາວ ໄດ້ກ່າວວ່າ: “ວັກຊີນກັນມະເຮັງປາກມົດລູກສາມາດປ້ອງກັນເດັກຍິງຈາກພະຍາດຮ້າຍໄດ້. ວັກຊີນກັນມະເຮັງປາກມົດລູກແມ່ນໃຫ້ບໍລິການໂດຍບໍ່ເສຍຄ່າ ສໍາລັບເດັກຍິງທຸກຄົນທີ່ມີິອາຍຸລະຫວ່າງ 10 ຫາລຸ່ມ 17 ປີ. ວັກຊີນຊະນິດນີ້ປອດໄພ, ມີປະສິດທິພາບສູງ, ສາມາດປົກປ້ອງເດັກຍິງຈາກມະເຮັງປາກມົດລູກ ຊຶ່ງເປັນພະຍາດທີ່ເປັນອັນຕະລາຍແກ່ຊີວິດໄດ້.”
ທ່ານ ດຣ. Mohammed Yunus ໄດ້ກ່າວວ່າ: “ເດັກຍິງທຸກຄົນທີ່ມີອາຍຸລະຫວ່າງ 10 ຫາລຸ່ມ 17 ປີ ຕ້ອງໄດ້ຮັບວັກຊີນກັນມະເຮັງປາກມົດລູກສອງຄັ້ງສຳລັບໃນປີ 2023. ວັກຊີນເຫຼົ່ານີ້ປອດໄພ ແລະ ມີປະສິດທິພາບ ພ້ອມດຽວກັນນັ້ນວັກຊີນກັນມະເຮັງປາກມົດລູກ ຍັງສາມາດສັກພ້ອມກັບວັກຊີນໂຄວິດ-19 ໄດ້.”
ເດັກຍິງອາຍຸ 10 ຫາລຸ່ມ 17 ປີ ທຸກຄົນສາມາດໄປຮັບວັກຊີນກັນມະເຮັງປາກມົດລູກໄດ້ ທີ່ ໂຮງຮຽນ ແລະ ໃນສະຖານທີ່ບໍລິການສາທາລະນະສຸກໃກ້ບ້ານທ່ານ. ວັກຊີນກັນ ມະເຮັງປາກມົດລູກ ມີໃຫ້ບໍລິການໃນຂອບເຂດທົ່ວປະເທດ.
ວັກຊີນດັ່ງກ່າວໄດ້ຮັບທຶນສະໜັບສະໜູນຈາກກອງທຶນກາວີ, ອົງການອະນາໄມໂລກ, ອົງການຢູນິເຊັບ ໂດຍຮ່ວມກັບກະຊວງສາທາລະນະສຸກ ແລະ ກະຊວງສຶກສາທິການ ແລະ ກິລາ ໃນການໃຫ້ບໍລິການ ໂດຍເຊື່ອມສານກັບການສັກວັກຊີນໂຄວິດ-19.
ລັດຖະບານແຫ່ງ ສປປ ລາວ ຊ່ວຍປົກປ້ອງໄວໜຸ່ມ ແລະ ເດັກຍິງຮຸ່ນຕໍ່ໄປຈາກການເປັນມະເຮັງປາກມົດລູກ ໂດຍການໃຫ້ບໍລິການວັກຊີນ.