ສປປ ລາວ ເຜີຍແຜ່ກົດໝາຍສະບັບໃໝ່ ເພື່ອປົກປ້ອງສຸຂະພາບຂອງປະຊາຊົນ

ມື້ນີ້ ໄດ້ມີການເຜີຍແຜ່ 3 ກົດໝາຍໃນຂົງເຂດສາທາລະນະສຸກ ສະບັບໃໝ່ 2 ສະບັບ (ກົດໝາຍ ວ່າດ້ວຍສາທາລະນະສຸກ ແລະ ກົດໝາຍ ວ່າດ້ວຍການຮັກສາສຸຂະພາບຂັ້ນຕົ້ນ) ແລະ ສະບັບປັບປຸງ 1 ສະບັບ (ກົດໝາຍ ວ່າດ້ວຍການປິ່ນປົວ) ເຊິ່ງມີເປົ້າໝາຍສ້າງຄວາມເຂັ້ມແຂງໃຫ້ແກ່ລະບົບສາທາລະນະສຸກຂອງ ສປປ ລາວ ແລະ ຍົກສູງສຸຂະພາບ ແລະ ຊີວິດການເປັນຢູ່ຂອງປະຊາຊົນລາວ, ໂດຍການເປັນປະທານຂອງ ທ່ານ ດຣ ສະໜອງ ທອງຊະນະ, ຮອງລັດຖະມົນຕີກະຊວງສາທາລະນະສຸກ, ໄດ້ມີຕາງໜ້າຈາກບັນດາກະຊວງ, ອົງການຈັດຕັ້ງສາກົນ, ຄະນະຫ້ອງການກະຊວງ, ບັນດາຫົວໜ້າກົມ, ຮອງກົມ, ຫົວໜ້າ ແລະ ຮອງສະຖາບັນ, ຜູ້ອຳນວຍການໂຮງໝໍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ ທີ່ນະຄອນຫຼວງວຽງຈັນ.

ທ່ານ ດຣ ສະໜອງ ທອງຊະນະ, ຮອງລັດຖະມົນຕີ ກະຊວງສາທາລະນະສຸກ ໄດ້ໃຫ້ກຽດກ່າວຄຳເຫັນວ່າ: “ກົດໝາຍດັ່ງກ່າວ ຖືເປັນບາດກ້າວສຳຄັນອັນໜຶ່ງ ໃນພາລະກິດການສະໜອງການບໍລິການປິ່ນປົວທີ່ມີຄຸນນະພາບໃຫ້ແກ່ພໍ່ແມ່ປະຊາຊົນທຸກຄົນ ເຊິ່ງກົດໝາຍເຫຼົ່ານີ້ ຈະເປັນເຄື່ອງມືຊ່ວຍໃຫ້ລັດຖະບານແກ້ໄຂບັນຫາທ້າທາຍໃນວຽກງານສາທາລະນະສຸກ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ.” “ການມີນິຕິກຳດ້ານສາທາລະນະສຸກທີ່ມີປະສິດທິພາບ ຖືເປັນເສົາຫຼັກອັນໜຶ່ງໃນການສ້າງລະບົບສາທາລະນະສຸກທີ່ເຂັ້ມແຂງ ແລະ ໝັ້ນຄົງ ເນື່ອງຈາກນິຕິກຳດັ່ງກ່າວ ຈະຊ່ວຍວາງກອບການຈັດຕັ້ງປະຕິບັດງານ ເພື່ອຮັບປະກັນການເຂົ້າເຖິງການບໍລິການປິ່ນປົວທີ່ມີຄຸນນະພາບ, ປົກປ້ອງສຸຂະພາບ ແລະ ສົ່ງເສີມຊີວິດການເປັນຢູ່ທີ່ດີຂອງພໍ່ແມ່ປະຊາຊົນທຸກຄົນ. ກົດໝາຍທັງ 3 ສະບັບນີ້ ຖືເປັນຜົນງານຢັ້ງຢືນຄວາມມຸ່ງໝັ້ນ ແລະ ເອົາໃຈໃສ່ຂອງລັດຖະບານໃນການລົງທຶນໃສ່ວຽກງານສາທາລະນະສຸກ ເພື່ອຍົກສູງຊີວິດການເປັນຢູ່ຂອງປະຊາຊົນລາວທັງໃນປັດຈຸບັນ ແລະ ອະນາຄົດ ແລະ ກົດໝາຍດັ່ງກ່າວ ຍັງເປັນຜົນງານອັນມາຈາກເຫື່ອແຮງ ແລະ ຄວາມເອົາໃຈໃສ່ຂອງບັນດາພະນັກງານ ແລະ ຄູ່ຮ່ວມພັດທະນາທີ່ກ່ຽວຂ້ອງ ອີກດ້ວຍ.”

ສະບັບທຳອິດ, “ກົດໝາຍ ວ່າດ້ວຍສາທາລະນະສຸກ” ໄດ້ມີຜົນສັກສິດນັບແຕ່ເດືອນກໍລະກົດ ປີ 2023 ເປັນຕົ້ນມາ ເຊິ່ງໄດ້ເນັ້ນໜັກຄວາມມຸ່ງໝັ້ນ ແລະ ເອົາໃຈໃສ່ຂອງລັດຖະບານຕໍ່ກັບຂະແໜງສາທາລະນະສຸກ ໂດຍສະເພາະໄດ້ກຳນົດໃຫ້ມີການຈັດສັນງົບປະມານຂອງຂະແໜງສາທາລະນະສຸກໃຫ້ກວມເອົາຢ່າງໜ້ອຍ 9% ຂຶ້ນໄປຂອງງົບປະມານແຫ່ງລັດ. ກົດໝາຍສະບັບນີ້ ຍັງມີບົດບາດໃນການເຊື່ອມຕໍ່ ແລະ ຊີ້ນຳນິຕິກຳຫຼາຍສະບັບທີ່ນອນໃນຂົງເຂດວຽກງານສາທາລະນະສຸກ ພ້ອມທັງກຳນົດພາລະບົດບາດ, ໂຄງຮ່າງການຈັດຕັ້ງ ແລະ ການດຳເນີນງານໂດຍລວມຂອງກະຊວງສາທາລະນະສຸກ ອີກດ້ວຍ.

ສະບັບທີ 2, “ກົດໝາຍ ວ່າດ້ວຍການຮັກສາສຸຂະພາບຂັ້ນຕົ້ນ” ໄດ້ມີຜົນສັກສິດນັບແຕ່ເດືອນພະຈິກ ປີ 2023 ເປັນຕົ້ນມາ ເຊິ່ງກົດໝາຍສະບັບນີ້ ໄດ້ຊຸກຍູ້ໃຫ້ປະຊາຊົນ ແລະ ອາສາສະໝັກສາທາລະນະສຸກຂັ້ນບ້ານມີສ່ວນຮ່ວມໃນການວາງແຜນ ແລະ ການໃຫ້ບໍລິການສຸຂະພາບຂັ້ນຕົ້ນ ພ້ອມທັງສ້າງຄວາມເຂັ້ມແຂງ ແລະ ເຊື່ອມສານການບໍລິການສຸຂະພາບ ເພື່ອໃຫ້ການ້ບໍລິການໃນຂັ້ນຊຸມຊົນມີປະສິດທິພາບຍິ່ງຂຶ້ນ. ກົດໝາຍສະບັບນີ້ ໄດ້ສ້າງຕັ້ງ “ຄະນະກຳມະການຮັກສາສຸຂະພາບຂັ້ນຕົ້ນ” ໃນຂັ້ນສູນກາງ ໂດຍມີຮອງນາຍົກລັດຖະມົນຕີ ເປັນຫົວໜ້າຄະນະ ແລະ ມີຮອງຫົວໜ້າຄະນະ ແລະ ບັນດາກຳມະການເປັນຕາງໜ້າຈາກຂະແໜງສາທາລະນະສຸກ, ພາຍໃນ, ສຶກສາທິການ ແລະ ກິລາ, ກະຊວງ ແລະ ພາກສ່ວນອື່ນໆ ທີ່ກ່ຽວຂ້ອງ. ຄະນະກຳມະການດັ່ງກ່າວ ແລະ ແຕ່ລະພາກສ່ວນໃນກົດໝາຍສະບັບນີ້ ຈະສົ່ງເສີມໃຫ້ມີການບໍລິຫານຮ່ວມກັນຫຼາຍພາກສ່ວນ ເພື່ອໃຫ້ສາມາດຈັດຕັ້ງປະຕິບັດກົດໝາຍ, ນະໂຍບາຍ ແລະ ຍຸດທະສາດທີ່ກ່ຽວພັນກັບການຮັກສາສຸຂະພາບຂັ້ນຕົ້ນໄດ້ຢ່າງມີປະສິດທິພາບຍິ່ງຂຶ້ນ ແລະ ຮັບປະກັນໃຫ້ຊຸມຊົນໄດ້ຮັບການປິ່ນປົວທີ່ດີຂຶ້ນ.

ສະບັບທີ 3, ກົດໝາຍ ວ່າດ້ວຍການປິ່ນປົວ (ສະບັບປັບປຸງ) ໄດ້ມີຜົນສັກສິດນັບແຕ່ເດືອນພະຈິກ ປີ 2023 ເປັນຕົ້ນມາ, ໄດ້ກຳນົດແນວທາງຈໍາເປັນໃນການຄຸ້ມຄອງສະຖານທີ່ບໍລິການປິ່ນປົວພາກເອກະຊົນທີ່ນັບມື້ນັບຂະຫຍາຍຕົວ ເຊິ່ງປະກອບມີ ການຂຶ້ນທະບຽນໂຮງໝໍ, ຄລິນິກ ແລະ ສູນການປິ່ນປົວເອກະຊົນ ແລະ ກໍານົດນິຍາມຂອງ “ຜູ້ປະກອບວິຊາຊີບປິ່ນປົວ” ໂດຍຕ້ອງມີໃບອະນຸຍາດເຄື່ອນໄຫວວິຊາຊີບປິ່ນປົວທີ່ອອກໃຫ້ໂດຍ ສະພາຄຸ້ມຄອງວິຊາຊີບສາທາລະນະສຸກ ແລະ ບັນທຶກເຂົ້າໃນຖານຂໍ້ມູນຂອງສະພາຄຸ້ມຄອງວິຊາຊີບສາທາລະນະສຸກ. ກົດໝາຍສະບັບນີ້ ຖ້າມີການຈັດຕັ້ງປະຕິບັດຢ່າງມີປະສິດທິພາບ ຈະຊ່ວຍຊຸກຍູ້ວຽກງານການຍົກສູງຄຸນນະພາບ ແລະ ຄວາມປອດໄພຂອງການບໍລິການປິ່ນປົວ ແລະ ສ້າງຄວາມເຂັ້ມແຂງໃຫ້ແກ່ບຸກຄະລາກອນການແພດ. ຄືກັນກັບກົດໝາຍສະບັບອື່ນໆ, ການຈັດຕັ້ງປະຕິບັດກົດໝາຍສະບັບນີ້ ແມ່ນຈຳເປັນຕ້ອງໄດ້ມີການປະສານງານກັນຢ່າງໃກ້ຊິດລະຫວ່າງບັນດາພາກສ່ວນທີ່ກ່ຽວຂ້ອງ ແລະ ຕ້ອງມີການສະໜັບສະໜູນຈາກຊຸມຊົນ ແລະ ພາກສ່ວນທີ່ກ່ຽວຂ້ອງ ອີກດ້ວຍ.

ກົດໝາຍທັງ 3 ສະບັບ ແມ່ນຮ່າງຂຶ້ນ ແລະ ປັບປຸງໂດຍ ກະຊວງສາທາລະນະສຸກ ຮ່ວມກັບສະພາແຫ່ງຊາດຫ້ອງວ່າການສຳນັກງານນາຍົກລັດຖະມົນຕີ, ກະຊວງຍຸຕິທຳ ແລະ ກະຊວງທີ່ກ່ຽວຂ້ອງ. ຂະບວນການຮ່າງກົດໝາຍ ວ່າດ້ວຍສາທາລະນະສຸກ ແມ່ນສະໜັບສະໜູນ ແລະ ຮ່ວມມືໂດຍອົງການອະນາໄມໂລກ ແລະ ສູນຄວບຄຸມ ແລະ ປ້ອງກັນພະຍາດ ຂອງສະຫະລັດອາເມລິກາ (USCDC). ກົດໝາຍ ວ່າດ້ວຍການຮັກສາສຸຂະພາບຂັ້ນຕົ້ນ ແມ່ນສະໜັບສະໜູນ ແລະ ຮ່ວມມືອົງການຢູນິເຊັບ ແລະ ອົງການອະນາໄມໂລກ. ການປັບປຸງກົດໝາຍ ວ່າດ້ວຍການປິ່ນປົວ ແມ່ນສະໜັບສະໜູນ ແລະ ຮ່ວມມືໂດຍອົງການອະນາໄມໂລກ.

ທ່ານ ດຣ ທິມ ອາມສະຕຣອງ ຈາກອົງການອະນາໄມໂລກ ໄດ້ມີຄຳເຫັນວ່າ: “ການຮັບຮອງເອົາກົດໝາຍເຫຼົ່ານີ້ ຖືເປັນບາດກ້າວອັນສຳຄັນສູ່ການບັນລຸການປົກຄຸມສຸຂະພາບທົ່ວປວງຊົນ ແລະ ສົ່ງເສີມໃຫ້ປະຊາຊົນທຸກຄົນໃນ ສປປ ລາວ ມີສຸຂະພາບດີ. ກົດໝາຍເຫຼົ່ານີ້ ຖືເປັນຜົນງານທີ່ສະທ້ອນເຖິງຄວາມມຸ່ງໝັ້ນໃນການສ້າງອະນາຄົດທີ່ປະຊາຊົນລາວທຸກຄົນມີສຸຂະພາບດີ ແລະ ມີໂອກາດໄດ້ໃຊ້ຊີວິດຢ່າງເຕັມທີ່. ອົງການອະນາໄມໂລກ ຖືເປັນກຽດທີ່ໄດ້ປະກອບສ່ວນໃນການປະຕິຮູບທາງກົດໝາຍຄັ້ງນີ້ ເຊິ່ງວຽກງານນີ້ກໍເປັນສ່ວນໜຶ່ງຂອງພາລະບົດບາດຫຼັກຂອງອົງການອະນາໄມໂລກ ແລະ ທີ່ສຳຄັນທີ່ສຸດ ແມ່ນໃນການຊ່ວຍເຫຼືອໃນການຈັດຕັ້ງປະຕິບັດກົດໝາຍດັ່ງກ່າວ ເພື່ອໃຫ້ປະຊາຊົນລາວທຸກຄົນໄດ້ມີຊີວິດການເປັນຢູ່ທີ່ດີຂຶ້ນ.”

ທ່ານ ອາຕູໂຣ ຣົມໂບລິ ຮອງຜູ້ຕາງໜ້າອົງການ ຢູນິເຊັບ ໄດ້ມີຄຳເຫັນວ່າ: “ກົດໝາຍ ວ່າດ້ວຍການຮັກສາສຸຂະພາບຂັ້ນຕົ້ນ ຖືເປັນບາດກ້າວສຳຄັນສຳລັບ ສປປ ລາວ ໃນການຫັນທິດທາງຂອງລັດຖະບານໃຫ້ເປັນຮູບປະທຳຍິ່ງຂຶ້ນ ເພື່ອຮັບປະກັນໃຫ້ທຸກຄອບຄົວ ໂດຍສະເພາະຄອບຄົວທີ່ອາໄສຢູ່ເຂດຫ່າງໄກສອກຫຼີກ ສາມາດເຂົ້າເຖິງການບໍລິການສຸຂະພາບທີ່ຈຳເປັນ. ການຮ່ວມມືເຊິ່ງກັນ ແລະ ກັນ ຫຼາຍພາກສ່ວນ ໃນວຽກງານສາທາລະນະສຸກ, ການສຶກສາ, ນ້ຳສະອາດ, ສຸຂາພິບານ ແລະ ການປົກປ້ອງທາງສັງຄົມ ຖືເປັນກຸນແຈທີ່ຈະນຳໄປສູ່ຄວາມສຳເລັດ. ອົງການຢູນິເຊັບ ມີຄວາມພາກພູມໃຈທີ່ໄດ້ຢືນຄຽງຂ້າງກະຊວງສາທາລະນະສຸກ, ອົງການອະນາໄມໂລກ ແລະ ຄູ່ຮ່ວມງານທຸກພາກສ່ວນໃນວຽກງານການສ້າງຄວາມເຂັ້ມແຂງໃຫ່ແກ່ການບໍລິການສຸຂະພາບ ແລະ ຮັບປະກັນບໍ່ໃຫ້ໃຜຖືກປະຖິ້ມໄວ້ຂ້າງຫຼັງ.”

ນັບແຕ່ປີ 2021 ເປັນຕົ້ນມາ, ກະຊວງສາທາລະນະສຸກ ໄດ້ມີຄວາມຄືບໜ້າຢ່າງພົ້ນເດັ່ນໃນການພັດທະນາກົດໝາຍໃນຂົງເຂດສາທາລະນະສຸກ. ນອກຈາກກົດໝາຍ ວ່າດ້ວຍສາທາລະນະສຸກ ທີ່ໄດ້ເຜີຍແຜ່ໄປແລ້ວນີ້, ກະຊວງສາທາລະນະສຸກ ຍັງພວມດຳເນີນການປັບປຸງ ກົດໝາຍ ວ່າດ້ວຍການປະກັນສຸຂະພາບ ແລະ ກົດໝາຍ ວ່າດ້ວຍຢາ ແລະ ຜະລິດຕະພັນການແພດ ໂດຍໄດ້ຮັບການສະໜັບສະໜູນຈາກອົງການອະນາໄມໂລກ ແລະ ຄູ່ຮ່ວມພັດທະນາພາກສ່ວນອື່ນໆ.