ສປປ ລາວ ແລະ ຄູ່ຮ່ວມພັດທະນາຮ່ວມໃຈຈັດຕັ້ງປະຕິບັດມາດຕະການຫຼາຍຂະແໜງການ ເພື່ອຮັບມືກັບ ເຊື້ອຈຸລະຊີບຕ້ານຕໍ່ຢາ

ນະຄອນຫຼວງວຽງຈັນ, ສປປ ລາວ, ວັນທີ 18 ພະຈິກ 2025 – ລັດຖະບານ ແຫ່ງ ສປປ ລາວ, ຮ່ວມກັບອົງການອາຫານ ແລະ ການກະເສດ ແຫ່ງ ສະຫະປະຊາຊາດ (FAO), ອົງການອະນາໄມໂລກ (WHO), ມູນນິທິເມຣີເອີ, ບັນດາຄູ່ຮ່ວມງານໃນລະດັບທ້ອງຖິ່ນ ແລະ ສາກົນ, ສະຖາບັນການສືກສາ, ໂຮງໝໍ, ຜູ້ໃຫ້ບໍລິການດ້ານສຸຂະພາບ, ແລະ ພາກເອກະຊົນ, ໄດ້ເປີດກອງປະຊຸມຢ່າງເປັນທາງການ ຢູ່ ໂຮງແຮມແລນມາກ ເພື່ອສ້າງຄວາມຮັບຮູ້ຕໍ່ກັບໄພຂົ່ມຂູ່ດ້ານສາທາລະນະສຸກທີ່ກໍາລັງເພີ່ມຂຶ້ນໃນທົ່ວໂລກ ເຊິ່ງເອີ້ນກັນວ່າ ເຊື້ອຈຸລະຊີບຕ້ານຕໍ່ຢາ (AMR), ພ້ອມທັງເປັນການສ້າງຄວາມຮັບຮູ້ໃຫ້ແກ່ປະຊາຊົນ ໂດຍຜ່ານງານສັບປະດາສາກົນປູກຈິດສໍານຶກກ່ຽວກັບເຊື້ອຈຸລະຊີບຕ້ານຕໍ່ຢາ ທີ່ຈັດຂຶ້ນເປັນປະຈໍາທຸກໆປີ, ເຊິ່ງເປັນຄໍາໝັ້ນສັນຍາໃນການຮ່ວມມືກັນຂອງຫຼາຍພາກສ່ວນ.

ສັບປະດາສາກົນປູກຈິດສໍານຶກກ່ຽວກັບເຊື້ອຈຸລະຊີບຕ້ານຕໍ່ຢາ (WAAW) ໄດ້ຮັບການສະເຫຼີມສະຫຼອງເປັນປະຈໍາໃນເດືອນ ພະຈິກ ຂອງທຸກໆປີ ເພື່ອສ້າງຄວາມຮັບຮູ້ກ່ຽວກັບປະກົດການ ເຊື້ອຈຸລະຊີບຕ້ານຕໍ່ຢາ (AMR) ແລະ ເປັນການສ້າງແຮງບັນດານໃຈໃນການດໍາເນີນການເພື່ອຮັກສາປະສິດທິພາບຂອງຢາປິ່ນປົວພະຍາດ. ໃນຂະນະທີ່ AMR ສາມາດເກີດຂຶ້ນໄດ້ຕາມປະກົດການທາງທໍາມະຊາດ, ແຕ່ໄພຂົ່ມຂູ່ດັ່ງກ່າວນີ້ ໄດ້ເພີ່ມທະວີຄວາມໄວຂຶ້ນຈາກການໃຊ້ຢາຕ້ານເຊື້ອຫຼາຍເກີນໄປ ແລະ ການໃຊ້ຢາບໍ່ຖືກຕາມຫຼັກວິຊາການທັງໃນສຸຂະພາບຂອງຄົນ ແລະ ສັດ, ລວມທັງ ການພັດທະນາຢາຕ້ານເຊື້ອຊະນິດໃໝ່ທີ່ຫຼຸດລົງ. ຜົນຂອງການວິເຄາະສະຖານະການຈາກສາກົນ ໄດ້ປະເມີນໄວ້ວ່າ ຖ້າທ່າອ່ຽງໃນປະຈຸບັນຍັງສືບຕໍ່, ພາຍໃນປີ 2050, AMR ອາດຈະເຮັດໃຫ້ມີຜູ້ເສຍຊີວິດເຖິງ 10 ລ້ານຄົນຕໍ່ປີ ແລະ ເຮັດໃຫ້ເກີດການສູນເສຍເສດຖະກິດປະມານ 100 ພັນຕື້ໂດລາສະຫະລັດ. ຍ້ອນເຫດຜົນດັ່ງກ່າວ ໃນປະຈຸບັນຈຶ່ງຈໍາເປັນຕ້ອງມີການຈັດຕັ້ງປະຕິບັດຮ່ວມກັນຫຼາຍຂຶ້ນກວ່າເກົ່າ ເພື່ອຮັບປະກັນວ່າຢາຕ້ານເຊື້ອຍັງຄົງມີປະສິດທິພາບສຳລັບຄົນລຸ້ນຕໍ່ໆໄປ.

ທ່ານນາງ ອາພອນ ວິຊາເທບ, ຮອງລັດຖະມົນຕີ, ກະຊວງສາທາລະນະສຸກ, ໄດ້ໃຫ້ຂໍ້ສັງເກດວ່າ ສປປ ລາວ ໄດ້ເຂົ້າຮ່ວມກັບປະຊາຄົມໂລກໃນການສະເຫຼີມສະຫຼອງ ສັບປະດາສາກົນປູກຈິດສໍານຶກກ່ຽວກັບເຊື້ອຈຸລະຊີບຕ້ານຕໍ່ຢາ ເປັນປະຈຳທຸກປີ, ເຊິ່ງໄດ້ຮຽກຮ້ອງໃຫ້ມີການດຳເນີນການຈັດຕັ້ງປະຕິບັດຢ່າງຮີບດ່ວນເພື່ອຮັກສາປະສິດທິພາບຂອງຢາປິ່ນປົວພະຍາດຕ່າງໆ. ທ່ານນາງ ອາພອນ ວິຊາເທບ ໄດ້ເນັ້ນໜັກວ່າ ຢູ່ໃນຂະແໜງສາທາລະນະສຸກ ເຊື້ອຈຸລະຊີບຕ້ານຕໍ່ຢາ ຖືເປັນໄພຂົ່ມຂູ່ເຮັດໃຫ້ຄວາມກ້າວໜ້າຖອຍຫຼັງໄປເປັນຫຼາຍທົດສະວັດ. ເພື່ອຕອບໂຕ້ກັບປະກົດການດັ່ງກ່າວ, ສປປ ລາວ ກຳລັງເພີ່ມທະວີການເຝົ້າລະວັງ, ການປ້ອງກັນການຕິດເຊື້ອ, ແລະ ການໃຊ້ຢາຢ່າງມີຄວາມຮັບຜິດຊອບ ເພື່ອປົກປ້ອງປະຊາຊົນ. ເຖິງຢ່າງໃດກໍຕາມ, ການແກ້ໄຂບັນຫາ ເຊື້ອຈຸລະຊີບຕ້ານຕໍ່ຢາ ຈໍາເປັນຕ້ອງໄດ້ຮັບການຮ່ວມມື ແລະ ການສະໜັບສະໜູນຈາກທຸກຂະແໜງການເພື່ອຮັບປະກັນວ່າປະຊາຊົນທຸກຄົນສາມາດເຂົ້າເຖິງການປິ່ນປົວທີ່ປອດໄພ ແລະ ມີປະສິດທິພາບເມື່ອເຂົາເຈົ້າຕ້ອງການ.

ການໂຄສະນາສ້າງຄວາມຮັບຮູ້ ທີ່ດຳເນີນເປັນເວລາໜຶ່ງອາທິດ ໄດ້ເນັ້ນໃຫ້ເຫັນເຖິງໄພຂົ່ມຂູ່ທີ່ເພີ່ມຂຶ້ນຂອງ ເຊື້ອຈຸລະຊີບຕ້ານຕໍ່ຢາ ແລະ ຄວາມຈໍາເປັນໃນການຕອບໂຕ້ຮ່ວມກັນໃນທົ່ວຂະແໜງການ, ຄົນ, ສັດ ແລະ ສິ່ງແວດລ້ອມ ເພື່ອປົກປ້ອງສຸຂະພາບ, ຄວາມໝັ້ນຄົງດ້ານສະບຽງອາຫານ ແລະ ສິ່ງແວດລ້ອມ.

ທ່ານ ດຣ. ກິແກ້ວ ສິງນະວົງ, ຮອງລັດຖະມົນຕີ, ກະຊວງກະສິກຳ ແລະ ສິ່ງແວດລ້ອມ, ໄດ້ເນັ້ນໜັກເຖິງຄວາມສຳຄັນຂອງການກະສິກຳແບບຍືນຍົງ ແລະ ການຄຸ້ມຄອງສິ່ງແວດລ້ອມ, ຖືເອົາຊາວກະສິກອນ ແລະ ສັດຕະວະແພດ ເປັນກອງນໍາໜ້າໃນການປະເຊີນກັບສິ່ງທ້າທາຍດັ່ງກ່າວນີ້. ໂດຍການສົ່ງເສີມການໃຊ້ຢາຕ້ານເຊື້ອໃນສັດລ້ຽງຢ່າງມີຄວາມຮັບຜິດຊອບ, ການປັບປຸງຄວາມປອດໄພທາງຊີວະພາບ ແລະ ການປົກປ້ອງລະບົບນິເວດ, ສຸຂະພາບຂອງຄົນ, ສັດ ແລະ ສິ່ງແວດລ້ອມ ແລະ ຮັບປະກັນເຮັດໃຫ້ລະບົບການຜະລິດ ແລະ ການສະໜອງສະບຽງອາຫານ ແລະ ຊັບພະຍາກອນທຳມະຊາດທີ່ຫຼໍ່ລ້ຽງປະເທດຊາດ ມີຄວາມໝັ້ນຄົງ. ທ່ານ ດຣ. ກິແກ້ວ ສິງນະວົງ ຍັງໄດ້ເນັ້ນໜັກວ່າ ເຊື້ອຈຸລະຊີບຕ້ານຕໍ່ຢາ ແມ່ນຄວາມຮັບຜິດຊອບຮ່ວມກັນ, ແລະ ຂະແໜງກະສິກໍາ ແລະ ສິ່ງແວດລ້ອມ ມີບົດບາດສຳຄັນໃນການແກ້ໄຂບັນຫາດັ່ງກ່າວ.

ຄໍາຂວັນສຳລັບປີ 2025, “ລົງມືປະຕິບັດດຽວນີ້: ເພື່ອປົກປ້ອງປະຈຸບັນ ແລະ ຮັບປະກັນອະນາຄົດຂອງພວກເຮົາ”, ໄດ້ຖືກອອກແບບມາເພື່ອຊຸກຍູ້ການຈັດຕັ້ງປະຕິບັດທີ່ດີທີ່ສຸດໃນທົ່ວໂລກ ໃນບັນດາປະຊາຊົນ, ຊຸມຊົນ, ພະນັກງານສາທາລະນະສຸກ, ຊາວກະສິກອນ, ຜູ້ກຳນົດນະໂຍບາຍ ແລະ ຄູ່ຮ່ວມພັດທະນາ. ການໂຄສະນາສ້າງຄວາມຮັບຮູ້ດັ່ງກ່າວຍັງຮຽກຮ້ອງໃຫ້ທຸກຂະແໜງການລົງມືຈັດຕັ້ງປະຕິບັດໂດຍທັນທີ ເພື່ອເຂົ້າຮ່ວມໃນການຮັກສາປະສິດທິພາບຂອງຢາປິ່ນປົວພະຍາດຕ່າງໆ ແລະ ຮັກສາລະບົບການເຝົ້າລະວັງທີ່ເຂັ້ມແຂງໃນທົ່ວຂະແໜງການ, ຄົນ, ສັດ ແລະ ສິ່ງແວດລ້ອມ, ເຊິ່ງເປັນສ່ວນໜຶ່ງຂອງອະນາຄົດທີ່ມີສຸຂະພາບດີກວ່າສຳລັບໝົດທຸກຄົນ.

ທ່ານ ດຣ. ທິໂມທີ ອາມສະຕຣອງ, ຜູ້ຕາງໜ້າອົງການອະນາໄມໂລກປະຈຳ ສປປ ລາວ, ໄດ້ສະແດງຄວາມຊົມເຊີຍຕໍ່ກັບຄວາມພະຍາຍາມຮ່ວມກັນເພື່ອສະໜັບສະໜູນບັນດາເປົ້າໝາຍຄຳໝັ້ນສັນຍາລະດັບສູງທົ່ວໂລກເພື່ອຕໍ່ສູ້ກັບເຊື້ອຈຸລະຊີບຕ້ານຕໍ່ຢາ. ທ່ານ ດຣ. ທິໂມທີ ອາມສະຕຣອງ ໄດ້ຊົມເຊີຍ ສປປ ລາວ ຕໍ່ກັບຄວາມພະຍາຍາມທີ່ໂດດເດັ່ນ ແລະ ຄວາມກ້າວໜ້າທີ່ສຳຄັນໃນການຕໍ່ສູ້ກັບ ເຊື້ອຈຸລະຊີບຕ້ານຕໍ່ຢາ ໃນໄລຍະທົດສະວັດທີ່ຜ່ານມາ, ໃນຂະນະທີ່ ໄພຂົ່ມຂູ່ທົ່ວໂລກ ແລະ ພາກພື້ນຍັງສືບຕໍ່ເພີ່ມຂຶ້ນ. ທ່ານ ດຣ. ທິໂມທີ ອາມສະຕຣອງ ໄດ້ຢືນຢັນຄຳໝັ້ນສັນຍາທີ່ເດັດດ່ຽວຂອງ ອົງການອະນາໄມໂລກ ທັງໃນພາກພື້ນ ແລະ ທົ່ວໂລກ ໃນການແກ້ໄຂບັນຫາ ເຊື້ອຈຸລະຊີບຕ້ານຕໍ່ຢາ ແລະ ໄດ້ເນັ້ນໜັກເຖິງຄວາມສຳຄັນຂອງການຮ່ວມມືກັນຂອງຫຼາຍຂະແໜງການ ລະຫວ່າງລັດຖະບານ, ຄູ່ຮ່ວມພັດທະນາສາກົນ, ແລະ ອົງການຈັດຕັ້ງທາງສັງຄົມ. ກອງປະຊຸມຄັ້ງນີ້ໄດ້ເນັ້ນໜັກເຖິງຄວາມເປັນຜູ້ນຳ ແລະ ຄວາມຮັບຜິດຊອບຮ່ວມກັນລະຫວ່າງຄູ່ຮ່ວມພັດທະນາ ແລະ ບັນດາຜູ້ມີສ່ວນຮ່ວມທີ່ສຳຄັນ, ເສີມສ້າງການປະສານງານເພື່ອສົ່ງເສີມການຈັດຕັ້ງປະຕິບັດທີ່ມີຜົນກະທົບຕໍ່ກັບ ເຊື້ອຈຸລະຊີບຕ້ານຕໍ່ຢາ ໃນທຸກລະດັບ. ທ່ານ ດຣ. ທິໂມທີ ອາມສະຕຣອງ ໄດ້ເນັ້ນໜັກເຖິງຄວາມສຳຄັນຂອງການຮ່ວມມືຫຼາຍຂະແໜງການ, ການສະໜັບສະໜູນຮ່ວມກັນຢ່າງຕໍ່ເນື່ອງ, ແລະ ຄຳໝັ້ນສັນຍາຂອງຄູ່ຮ່ວມພັດທະນາເພື່ອຈັດຕັ້ງປະຕິບັດ ແຜນຍຸດທະສາດແຫ່ງຊາດກ່ຽວກັບ ເຊື້ອຈຸລະຊີບຕ້ານຕໍ່ຢາ ໃນ ສປປ ລາວ ທີ່ໄດ້ຮັບການປັບປຸງ, ເຊິ່ງເປັນການຜັນຂະຫຍາຍຄວາມສໍາເລັດຕໍ່ຈາກ ກອງທຶນ Fleming Fund.

ທ່ານ ດຣ. ເດວິດ ຣາມີນາສວິລີ, ຜູ້ຕາງໜ້າ ມູນນິທິເມຣິເອີສ໌ ປະຈຳ ສປປ ລາວ, ໄດ້ເນັ້ນໜັກວ່າ ກິດຈະກໍາສ້າງຄວາມຮັບຮູ້ໃຫ້ແກ່ຊຸມຊົນ ແລະ ການມີສ່ວນຮ່ວມຂອງຊາວໜຸ່ມ ໃນທົ່ວປະເທດ ແມ່ນມີຄວາມສຳຄັນຫຼາຍຕໍ່ກັບການປັບປ່ຽນພຶດຕິກຳທີ່ມີຄວາມຮັບຜິດຊອບ. ເພື່ອຮັບປະກັນຜົນໄດ້ຮັບທີ່ຄາດໄວ້ໃນການຮັບມືກັບ ເຊື້ອຈຸລະຊີບຕ້ານຕໍ່ຢາ, ທ່ານ ດຣ. ເດວິດ ຣາມີນາສວິລີ ໄດ້ຢືນຢັນອີກຄັ້ງວ່າ ມູນນິທິເມຣິເອີສ໌ ມີຄວາມພູມໃຈທີ່ໄດ້ຢືນຢູ່ຄຽງຂ້າງ ສປປ ລາວ ແລະ ຄູ່ຮ່ວມງານໃນການສະໜັບສະໜູນພື້ນຖານທາງວິທະຍາສາດ ແລະ ລະບົບຫ້ອງວິໄຈທີ່ເຂັ້ມແຂງ, ພ້ອມທັງການສ້າງເຄືອຂ່າຍການເຝົ້າລະວັງ ແລະ ການແລກປ່ຽນຄວາມຮູ້ໃນທົ່ວຂະແໜງສຸຂະພາບຄົນ, ສັດ ແລະ ສິ່ງແວດລ້ອມ. ໂດຍການລົງທຶນໃນວິທະຍາສາດ, ການຝຶກອົບຮົມ, ແລະ ການຮ່ວມມື, ຊຸມຊົນຈະໄດ້ຮັບການປົກປ້ອງທີ່ດີຂຶ້ນ ແລະ ຢາປິ່ນປົວພະຍາດຈະຍັງຄົງມີປະສິດທິພາບສຳລັບຄົນລຸ້ນຫຼັງ. ແນວທາງສຸຂະພາບໜຶ່ງດຽວ ບໍ່ພຽງແຕ່ເປັນຫຼັກການເທົ່ານັ້ນ - ມັນເປັນເສັ້ນທາງໄປສູ່ການປົກປ້ອງສຸຂະພາບ, ຄວາມໝັ້ນຄົງດ້ານສະບຽງອາຫານ, ແລະ ການພັດທະນາທີ່ຍືນຍົງ.

ສປປ ລາວ ໄດ້ພິສູດໃຫ້ເຫັນເຖິງຄວາມມຸ່ງໝັ້ນທີ່ມີຕໍ່ແນວທາງສຸຂະພາບໜຶ່ງດຽວ. ການຮ່ວມມືລະຫວ່າງກະຊວງສາທາລະນະສຸກ ແລະ ກະຊວງກະສິກຳ ແລະ ສິ່ງແວດລ້ອມ ແມ່ນຫຼັກຖານທີ່ສໍາຄັນ ກ່ຽວກັບ ຫຼັກການສຸຂະພາບໜຶ່ງດຽວ ໃນການແກ້ໄຂສິ່ງທ້າທາຍ ແລະ ຜົນກະທົບຕ່າງໆຂອງ ເຊື້ອຈຸລະຊີບຕ້ານຕໍ່ຢາ ຕໍ່ກັບ ສາທາລະນະສຸກ, ຄວາມໝັ້ນຄົງດ້ານສະບຽງອາຫານ ແລະ ການຂະຫຍາຍຕົວທາງດ້ານເສດຖະກິດ. ການສ້າງຕັ້ງຄະນະກຳມະການ ຄວບຄຸມເຊື້ອຈຸລະຊີບຕ້ານຕໍ່ຢາ ໂດຍມີຫຼາຍຂະແໜງການ ແລະ ຄວາມກ້າວໜ້າຂອງແຜນຍຸດທະສາດແຫ່ງຊາດກ່ຽວກັບ ເຊື້ອຈຸລະຊີບຕ້ານຕໍ່ຢາ (2026-2030) ແມ່ນໝາກຜົນທີ່ໄດ້ຮັບຈາກຕົວແບບດັ່ງກ່າວ.

ທ່ານນາງ ຄະຍອງ-ມີ ຄິມ, ຜູ້ຕາງໜ້າອົງການ FAO ປະຈຳ ສປປ ລາວ, ໄດ້ເນັ້ນໜັກວ່າ ເຊື້ອຈຸລະຊີບຕ້ານຕໍ່ຢາ ແມ່ນການລະບາດທີ່ມິດງຽບ ແລະ ມັນເປັນວິກິດການທີ່ເກີດຂຶ້ນໃນເງົາມືດ, ແຕ່ຜົນກະທົບຂອງມັນມີຄວາມຮຸນແຮງທຽບເທົ່າກັບການປ່ຽນແປງຂອງດິນຟ້າອາກາດ. ເນື່ອງຈາກອາຫານ ແລະ ກະສິກຳເປັນຈຸດໃຈກາງຂອງສິ່ງທ້າທາຍທາງດ້ານ ເຊື້ອຈຸລະຊີບຕ້ານຕໍ່ຢາ, ອົງການ FAO ມີຄວາມພູມໃຈທີ່ໄດ້ສະໜັບສະໜູນ ສປປ ລາວ ໃນການສ້າງລະບົບສະບຽງອາຫານທີ່ທົນທານ ເຊິ່ງຫຼຸດຜ່ອນການເພິ່ງພາຢາຕ້ານເຊື້ອໃນການກະສິກຳ, ການສັດລ້ຽງ ແລະ ການລ້ຽງສັດນ້ຳ; ສົ່ງເສີມຄວາມປອດໄພທາງຊີວະພາບ, ສຸຂະອະນາໄມທີ່ດີ ແລະ ການຈັດຕັ້ງປະຕິບັດກະສິກຳທີ່ດີ; ຈັດຕັ້ງປະຕິບັດການເຝົ້າລະວັງ ເຊື້ອຈຸລະຊີບຕ້ານຕໍ່ຢາ ຢ່າງຕັ້ງໜ້າ ຢູ່ໃນຂະແໜງການລ້ຽງສັດ ແລະ ການລ້ຽງສັດນ້ຳ; ປັບປຸງຫ້ອງວິໄຈ ແລະ ເສີມສ້າງຄວາມສາມາດດ້ານການວິໄຈ; ແລະ ປົກປ້ອງຊີວິດການເປັນຢູ່ ພ້ອມທັງ ການຮັບປະກັນການຜະລິດທີ່ດີຂຶ້ນ, ໂພຊະນາການທີ່ດີຂຶ້ນ, ສິ່ງແວດລ້ອມທີ່ດີຂຶ້ນ ແລະ ຊີວິດທີ່ດີຂຶ້ນສຳລັບທຸກຄົນ. ທ່ານນາງ ຄະຍອງ-ມີ ຄິມ ຍັງໄດ້ຮຽກຮ້ອງການມີສ່ວນຮ່ວມ ແລະ ຄຳໝັ້ນສັນຍາຮ່ວມກັນ ຈາກທຸກຂະແໜງການເພື່ອຮັບມືກັບສິ່ງທ້າທາຍ ແລະ ໃຊ້ມາດຕະການທີ່ເຂັ້ມແຂງ ແລະ ເດັດຂາດຫຼາຍຂຶ້ນ ເພື່ອຮັບມືກັບ ເຊື້ອຈຸລະຊີບຕ້ານຕໍ່ຢາ ແລະ ໄພຂົ່ມຂູ່ທີ່ເພີ່ມຂຶ້ນ. ທ່ານນາງ ຄະຍອງ-ມີ ຄິມ ຍັງໄດ້ຮັບປະກັນວ່າ ອາຫານທີ່ປອດໄພ ແລະ ສິ່ງແວດລ້ອມທີ່ອຸດົມສົມບູນຈະຍັງຄົງຢູ່ກັບຄົນລຸ້ນຫຼັງສືບຕໍ່ໄປ ຖ້າພວກເຮົາຮ່ວມມືກັນ.

ຕະຫຼອດໜຶ່ງອາທິດ, ສປປ ລາວ ຈະເປັນເຈົ້າພາບຈັດການໂຄສະນາສ້າງຄວາມຮັບຮູ້ໃນຊຸມຊົນ, ກອງປະຊຸມດ້ານວິຊາການ, ການເຜີຍແຜ່ຂໍ້ມູນໃນໂຮງຮຽນ, ແລະ ການສົນທະນາຜ່ານສື່ມວນຊົນ ເພື່ອເນັ້ນໃຫ້ເຫັນເຖິງຄວາມສ່ຽງຂອງ ເຊື້ອຈຸລະຊີບຕ້ານຕໍ່ຢາ ແລະ ສົ່ງເສີມແນວທາງການແກ້ໄຂທີ່ສາມາດປະຕິບັດໄດ້ຈິງ. ກິດຈະກໍາຕ່າງໆທີ່ນຳພາໂດຍຊາວໜຸ່ມ, ລວມທັງການໂຕ້ວາທີ ແລະ ການແຂ່ງຂັນສິລະປະ, ໄດ້ຈັດຂຶ້ນເພື່ອຊຸກຍູ້ໃຫ້ເກີດການມີສ່ວນຮ່ວມກັບຄົນລຸ້ນຕໍ່ໄປໃນການປົກປ້ອງອະນາຄົດຂອງຢາປິ່ນປົວພະຍາດ. ກິດຈະກຳເຫຼົ່ານີ້ແມ່ນສ່ວນໜຶ່ງຂອງ ແຜນຍຸດທະສາດແຫ່ງຊາດກ່ຽວກັບ ເຊື້ອຈຸລະຊີບຕ້ານຕໍ່ຢາ (2026-2030) ຂອງປະເທດ, ເຊິ່ງສອດຄ່ອງກັບຍຸດທະສາດສາກົນ ທີ່ນຳພາໂດຍ ອົງການຈັດຕັ້ງສີ່ຝ່າຍ (ອົງການ FAO, ອົງການ WHO, ອົງການສຸຂະພາບສັດສາກົນ (WOAH), ແລະ ອົງການສິ່ງແວດລ້ອມ ແຫ່ງ ສະຫະປະຊາຊາດ (UNEP)).