ການຊ່ວຍເຫຼືອເຄື່ອງຟອກໝາກໄຂ່ຫຼັງ ມູນຄ່າ 250 000 ໂດລາສະຫະລັດ ຈາກ ລັດຖະບານອົດສະຕຣາລີ ຈະເປັນການຊ່ວຍປົກປ້ອງຄົນເຈັບໃນ 4 ແຂວງ ຂອງ ສປປ ລາວ

ລັດຖະບານອົດສະຕຣາລີ ໄດ້ໃຫ້ການສະໜັບສະໜູນເຄື່ອງຟອກໝາກໄຂ່ຫຼັງ ຈໍານວນ 5 ໜ່ວຍ ສຳລັບໂຮງໝໍແຂວງບໍ່ແກ້ວ, ໄຊຍະບູລີ, ບໍລິຄຳໄຊ ແລະ ເຊກອງ ເຊິ່ງຈະຊ່ວຍເຫຼືອຊີວິດຄົນເຈັບຫຼາຍພັນຄົນ ແລະ ເພື່ອຮັບປະກັນຄຸນນະພາບຊີວິດທີ່ດີຂຶ້ນ ອີກດ້ວຍ.

ມື້ນີ້, ທີ່ ກະຊວງສາທາລະນະສຸກ, ນະຄອນຫຼວງວຽງຈັນ, ທ່ານ ນາງ ວາແນັດຊ້າ ເຮກາຕີ້ ເລຂາເອກ ສະຖານທູດອົດສະຕຣາລີ ແລະ ທ່ານ ດຣ ນາງ ຍິງ-ຣູ ແຈັກກະລິນ ໂລ ຜູ້ຕາງໜ້າອົງການອະນາໄມໂລກ ໄດ້ມອບເຄື່ອງຟອກໝາກໄຂ່ຫຼັງດັ່ງກ່າວໃຫ້ແກ່ ພະນະທ່ານ ປອ ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ທີ່ ກະຊວງສາທາລະນະສຸກ, ນະຄອນຫຼວງວຽງຈັນ.

ເຄື່ອງຟອກໝາກໄຂ່ຫຼັງດັ່ງກ່າວ ເຊິ່ງຈັດຊື້ໂດຍ ອົງການອະນາໄມໂລກ ຈະຊ່ວຍໃຫ້ຜູ້ທີ່ເປັນພະຍາດໝາກໄຂ່ຫຼັງສາມາດເຂົ້າເຖິງການປິ່ນປົວໄດ້ດີຂຶ້ນ ໂດຍຄາດວ່າຈະສາມາດຊ່ວຍເຫຼືອຄົນເຈັບໄດ້ຕື່ມອີກຫຼາຍກວ່າ 5 000 ຄົນ ຕໍ່ປີ. ນອກ​ນີ້, ​ຍັງ​ຈະເຮັດໃຫ້ຄົນເຈັບທີ່​ຕິດ​ເຊື້ອພະຍາດ​ໂຄ​ວິດ-19 ​ສາມາດໄດ້​ຮັບ​ການ​ປິ່ນປົວ​ແຍກຕ່າງຫາກ ເພື່ອຫຼຸດຜ່ອນ​ຄວາມ​ສ່ຽງ​ໃນການແຜ່​ລາມ​ຂອງ​ເຊື້ອ​ໄວຣັສດັ່ງກ່າວໄປ​ສູ່ຄົນເຈັບຜູ້ອື່ນໆ​.

ທ່ານ ລັດຖະມົນຕີ ກະຊວງສາທາລະນະສຸກ ໄດ້ກ່າວວ່າ: "ການສ້າງລະບົບສາທາລະນະສຸກທີ່ເຂັ້ມແຂງ ໝາຍເຖິງການປັບປຸງການບໍລິການໃຫ້ດີຂຶ້ນ, ຄຸນນະພາບຂອງການປິ່ນປົວທີ່ດີຂຶ້ນ ແລະ ຜົນໄດ້ຮັບທີ່ດີຂຶ້ນສໍາລັບຄົນເຈັບຂອງພວກເຮົາ. ທຸກບາດກ້າວຂອງການພັດທະນາລ້ວນແລ້ວແຕ່ເປັນການຊ່ວຍຊີວິດ ແລະ ຮັກສາສຸຂະພາບຂອງປະຊາຊົນບັນດາເຜົ່າທັງໝົດ."

"ຂ້າພະເຈົ້າຂໍສະແດງຄວາມຂອບໃຈມາຍັງລັດຖະບານອົດສະຕຣາລີ ສໍາລັບການຊ່ວຍເຫຼືອທີ່ສໍາຄັນແກ່ໂຮງໝໍແຂວງຂອງພວກເຮົາໃນຄັ້ງນີ້ ເຊິ່ງເປັນການປະກອບສ່ວນໃນວຽກງານການປິ່ນປົວຜູ້ທີ່ເປັນພະຍາດໝາກໄຂ່ຫຼັງ ແລະ ຄົນເຈັບຜູ້ອື່ນໆ ກໍຈະໄດ້ຮັບຜົນປະໂຫຍດຢ່າງຫຼວງຫຼາຍ ເຊັ່ນດຽວກັນ.”

ທ່ານ ນາງ ວາແນັດຊ້າ ເຮກາຕີ້, ເລຂາເອກ ສະຖານທູດອົດສະຕຣາລີ ໄດ້ກ່າວວ່າ: “ເຖິງວ່າການຊ່ວຍເຫຼືອນີ້ ຈະມາຈາກວຽກງານການຮັບມືກັບການລະບາດຂອງພະຍາດໂຄວິດ-19, ພວກເຮົາກໍມີຄວາມດີໃຈທີ່ການຊ່ວຍເຫຼືອຄັ້ງນີ້ຍັງຈະເປັນການສ້າງຄວາມອາດສາມາດໃນໄລຍະຍາວໃຫ້ແກ່ຂະແໜງສາທາລະນະສຸກ ໃນການສະໜອງການຟອກໝາກໄຂ່ຫຼັງໃຫ້ແກ່ປະຊາຊົນຜູ້ທີ່ມີຄວາມຕ້ອງການ ໂດຍສະເພາະຢູ່ບັນດາແຂວງ ແລະ ຍັງເປັນການຕໍ່ຊີວິດໃຫ້ແກ່ເຂົາເຈົ້າ ອີກດ້ວຍ.”

"ລັດຖະບານອົດສະຕຣາລີ ຍັງຄົງໃຫ້ຄຳໝັ້ນສັນຍາຈະສືບຕໍ່ຮັດແໜ້ນສາຍພົວພັນມິດຕະພາບອັນຍາວນານຂອງພວກເຮົາກັບ ສປປ ລາວ ໃນການຟື້ນຕົວຈາກການລະບາດຂອງພະຍາດໂຄວິດ-19, ວຽກງານສັກຢາກັນພະຍາດ ແລະ ໃນຂົງເຂດອື່ນໆອີກ."

​ນອກຈາກເຄື່ອງ​ຟອກໝາກໄຂ່ຫຼັງ, ລັດຖະບານອົດສະຕຣາລີ ຍັງໄດ້ຊ່ວຍເຫຼືອ​ເຄື່ອງ​ກວດ​ພະຍາດ​ໂຄ​ວິດ-19 ແບບ​ໄວ ຈຳນວນ 68 000 ຊຸດ ​ແລະ ຢາ​ປິ່ນປົວ​ທີ່​ຈຳ​ເປັນ​ໃນ​ການ​ປິ່ນປົວ​ພະຍາດ​ໂຄ​ວິດ-19 ​ເຊິ່ງໄດ້​ແຈກ​ຢາຍ​ໃຫ້ບັນດາ​ໂຮງໝໍ​ສູນ​ກາງ. ການຊ່ວຍເຫຼືອຄັ້ງນີ້ ແມ່ນເປັນການຊ່ວຍເຫຼືອເພີ່ມເຕີມຕໍ່ຈາກການຊ່ວຍເຫຼືອເຄື່ອງ​ຟອກໝາກໄຂ່ຫລັງ 4 ໜ່ວຍ ຈາກລັດຖະບານອົດສະຕຣາລີ ທີ່ໄດ້ມອບໃຫ້ແກ່ແຂວງຄໍາມ່ວນ, ສາລະວັນ ແລະ ຈໍາປາສັກ ໃນທ້າຍປີທີ່ຜ່ານມາ.

ທ່ານ ດຣ ນາງ ຍິງ-ຣູ ແຈັກກະລິນ ໂລ ຜູ້ຕາງໜ້າອົງການອະນາໄມໂລກ ໄດ້ໃຫ້ຄຳເຫັນວ່າ: "ນີ້ຖືເປັນປະໂຫຍດຢ່າງຍິ່ງ ສໍາລັບບຸກຄົນທີ່ເປັນພະຍາດໝາກໄຂ່ຫຼັງຊໍາເຮື້ອ ແລະ ຄອບຄົວຂອງພວກເຂົາ ເພາະຈະເປັນການຫຼຸດຜ່ອນການແບກຫາບພາລະຄ່າໃຊ້ຈ່າຍໃນການປິ່ນປົວໄດ້ຢ່າງຫຼວງຫຼາຍ. ຂ້າພະເຈົ້າຂໍຊົມເຊີຍກະຊວງສາທາລະນະສຸກ ສໍາລັບຄວາມພະຍາຍາມໃນການເພີ່ມຂີດຄວາມສາມາດໃນການຟອກໝາກໄຂ່ຫຼັງ ຢູ່ໃນສະຖານທີ່ປິ່ນປົວຂອງລັດຖະບານ."

 “ການຊ່ວຍເຫຼືອອັນເອື້ອເຟື້ອເຜື່ອແຜ່ຄັ້ງນີ້ ຈະເປັນການຮັບປະກັນໃຫ້ຜູ້ທີ່ມີຄວາມສ່ຽງສູງທີ່ເປັນພະຍາດໝາກໄຂ່ຫຼັງ ສາມາດໄດ້ຮັບການຊ່ວຍເຫຼືອທີ່ດີຂຶ້ນ ແລະ ຍັງຈະເປັນການສ້າງຄວາມເຂັ້ມແຂງໃຫ້ແກ່ລະບົບສາທາລະນະສຸກຂອງ ສປປ ລາວ ໃນອະນາຄົດ ອີກດ້ວຍ. ລັດຖະບານອົດສະຕຣາລີ ເປັນຄູ່ຮ່ວມງານທີ່ເອື້ອເຟື້ອເຜື່ອແຜ່ຕະຫຼອດໄລຍະການແຜ່ລະບາດຂອງພະຍາດໂຄວິດ-19 ທີ່ຜ່ານມາ ໃນການຕອບສະໜອງຕໍ່ຄວາມຮຽກຮ້ອງຕ້ອງການຂອງຂະແໜງສາທາລະນະສຸກ ທັງຄວາມຕ້ອງການທີ່ຮີບດ່ວນ ແລະ ໄລຍະຍາວ ເຊິ່ງພວກເຮົາຂໍຂອບໃຈເປັນຢ່າງຍິ່ງຕໍ່ການຊ່ວຍເຫຼືອຢ່າງຕໍ່ເນື່ອງຂອງພວກທ່ານ.”

ການຊ່ວຍເຫຼືອຄັ້ງນີ້ ເປັນສ່ວນໜຶ່ງຂອງການຊ່ວຍເຫຼືອເກືອບ 2 ລ້ານ (ສອງລ້ານ) ໂດລາສະຫະລັດ ຈາກລັດຖະບານອົດສະຕຣາລີ ໃຫ້ແກ່ອົງການອະນາໄມໂລກປະຈຳ ສປປ ລາວ ໃນວຽກງານການປ້ອງກັນ ແລະ ປິ່ນປົວພະຍາດໂຄວິດ-19, ການສັກວັກຊີນ ແລະ ບັນຫາສຸຂະພາບອື່ນໆ ໃນທົ່ວປະເທດ. ການຊ່ວຍເຫຼືອເບື້ອງຕົ້ນ ແມ່ນການສະໜັບສະໜູນເຄື່ອງກວດພະຍາດໂຄວິດ-19 ແລະ ການເຝົ້າລະວັງການລະບາດ, ງົບປະມານສຳລັບວັກຊີນ, ເຄື່ອງໃຊ້ສຳລັບຫ້ອງວິເຄາະ ແລະ ຄລີນິກ ພ້ອມທັງການຝຶກອົບຮົມຢ່າງຮອບດ້ານໃຫ້ແກ່ບຸກຄະລາກອນການແພດ ອີກດ້ວຍ.