2020 оны 4 дүгээр сарын 11-ний өдөр Дэлхийн Эрүүл Мэндийн Байгууллага (ДЭМБ) Эрүүл мэндийн яаманд (ЭМЯ) эмнэлгийн зориулалттай амны хаалт, нүүрний хамгаалалт, нүд хамгаалах шил, хамгаалалтын хувцас, бээлий зэрэг 220 сая гаруй төгрөгийн хувийн хамгаалах хэрэгсэл болон лабораторийн шинжилгээний урвалж оношлуурыг гардуулан өглөө. Эдгээр хувийн хамгаалах хэрэгсэл нь COVID-19-ийн тэргүүн эгнээнд ажиллаж буй эрүүл мэндийн ажилтнуудын эрүүл мэнд, аюулгүй байдлыг хамгаалахад нэн шаардлагатай бөгөөд тэд эрүүл, аюулгүй байснаар COVID-19-ийн халдвар авсан хүмүүсийг илүү сайн эмчлэх нөхцөл боломж бүрдэж буйг ДЭМБ-ын Монгол дахь Суурин төлөөлөгч Др Сергей Диордица онцлон хэллээ.

2019 оны 12 дугаар сард анхны тохиолдол бүртгэгдсэн цагаас эхлэн ДЭМБ нь ЭМЯ-тай хамтран ажиллаж, зөвлөмж, удирдамж, эрүүл мэндийн ажилтнуудын чадавхийг үндэсний хэмжээнд бэхжүүлэх, лабораторийн шинжилгээ, оношилгоо, шаардлагатай тоног төхөөрөмж, хувийн хамгаалах хэрэгслээр ханган, дэмжлэг үзүүлэн ажиллаж байна. “Өнөөдрийн байдлаар Монгол улсад 16 тохиолдол бүртгэгдээд байгаа нь хүн амын эрүүл мэндийн төлөө шаардлагатай арга хэмжээг цаг алдалгүй авч хэрэгжүүлэн, эцэлт цуцалтгүй ажиллаж байгаа эрүүл мэндийн болон бусад салбарын ажилтнуудын ажлын үр дүн юм” хэмээн Др Сергей цохон тэмдэглэж, Монгол Улсын аюулгүй байдлыг хангахад ЭМЯ болон Эрүүл мэндийн сайдын манлайллыг сайшаав.

Одоо албан ёсоор COVID-19 гэж нэрлэгдэж буй шалтгаан нь үл мэдэгдэх өвчний талаар мэдээллийг ДЭМБ анх авсан цагаас хойш 100 гаруй хоног өнгөрчээ. “Тэр цагаас хойш нэг ч өдөр эрүүл мэндийн салбар, ДЭМБ тусдаа ажилласангүй” хэмээн Эрүүл мэндийн сайд Д.Сарангэрэл хэлж, хувийн хамгаалах хэрэгслийн нөөцийг хангахад ДЭМБ-ын зүгээс 3 дахь удаагаа үзүүлж буй дэмжлэг болон бусад бүх чиглэлээр тусламж үзүүлж байгаад нь талархал илэрхийлэв. Энэ өвчинтэй тэмцэхэд Монгол Улсын Засгийн газар болон эрүүл мэндийн салбараас хэрэгжүүлж буй хариу арга хэмжээ, бэлэн байдлыг хангах ажлын зэрэгцээ хүн бүрийн оролцоо чухал болохыг Эрүүл мэндийн сайд онцолж, эрүүл мэндээ хамгаалах талаар зөвлөмжийг тогтмол хэрэгжүүлэхийг сануулсан юм.