“Настны эрүүл мэндийн цогц тусламж үйлчилгээнд салбар дундын оролцоог хангах нь” үндэсний зөвлөгөөнийг 2022 оны 11 дүгээр сарын 16-18 өдрүүдэд Эрүүл мэндийн яам, Геронтологийн үндэсний төв, Дэлхийн эрүүл мэндийн байгууллага хамтран зохион байгуулж байна. Тус үндэсний зөвлөгөөнд Эрүүл мэндийн яам, Хөдөлмөр нийгмийн хамгааллын яам, Хөдөлмөр халамж үйлчилгээний ерөнхий газар, АШУҮИС, Эрүүл мэндийн хөгжлийн төв, Нийгмийн эрүүл мэндийн үндэсний төв, Сэтгэцийн эрүүл мэндийн үндэсний төв, Азийн хөгжлийн банк, Улаанбаатар хотын 9 дүүргийн эрүүл мэндийн төвүүд, 21 аймгийн нэгдсэн эмнэлгүүд, эрүүл мэндийн газрууд болон өрх, сумын ЭМТ-ийн удирдлага, ахмад настны эрүүл мэндийн тусламж, үйлчилгээ хариуцсан эмч, мэргэжилтнүүд болон төрийн бус байгууллагууд зэрэг олон салбарын 120 гаруй төлөөлөгчид оролцож байна.

Нээлтийн үйл ажиллагаанд Эрүүл мэндийн яамны Анхан болон лавлагаа шатлалын тусламжийн хэлтсийн дарга Др Г.Навчаа, Геронтологийн үндэсний төвийн Ерөнхий захирал Р.Хишигжаргал, ДЭМБ-ын Суурин төлөөлөгчийн үүрэг гүйцэтгэгч Др П.Анузаяа нар оролцож, ахмад настанд эрүүл мэндийн тусламж, үйлчилгээг цогцоор үзүүлэхэд салбар дундын оролцоог хангах, эмч мэргэжилтнүүдийг чадавхжуулах нь нэн чухал болохыг онцлов. Мөн НҮБ-ын Ерөнхий Чуулганаар 2021-2030 оныг Эрүүл Насжилтын Арван жил болгон тунхагласантай холбогдуулан ДЭМБ-ын Номхон Далайн Баруун бүсийн гишүүн орнуудын зөвлөлдөн баталж, хэрэгжүүлж буй “Эрүүл насжилтын үйл ажиллагааны төлөвлөгөө”-г ДЭМБ-ын мэргэжилтэн Др Б.Алтанзагас танилцууллаа.

Үндэсний зөвлөгөөний үеэр настанд үзүүлж буй эрүүл мэндийн тусламж үйлчилгээний чанар, хүртээмжийг нэмэгдүүлэх талаар санал солилцох, настанд зонхилон тохиолддог өвчин эмгэгийн менежментийн талаар сургалт зохион байгуулах, настны эрүүл мэндийн болон нийгмийн эрүүл мэндийн тусламж үйлчилгээг салбар дундын оролцоог хангаж, цогцоор төлөвлөж хэрэгжүүлэх, настанд үзүүлж буй эрүүл мэндийн тусламж, үйлчилгээний сайн туршлагаас суралцах, нэвтрүүлэх, настны чиглэлээр боловсруулсан бодлогын баримт бичгийг танилцуулж санал авахад эрүүл мэндийн байгууллагын удирдлага, эмч мэргэжилтний  оролцоог хангах үйл ажиллагаанууд зохион байгуулагдана.