11 ДҮГЭЭР САРЫН 18-20, УЛААНБААТАР - Сум дундын болон сумын эрүүл мэндийн төвийн эмч, эх баригч нарт зориулсан “Нярайн эрт үеийн нэн шаардлагатай тусламж, үйлчилгээний дадлагажуулах сургалт” Эх хүүхдийн эрүүл мэндийн үндэсний төв /ЭХЭМҮТ/-ийн сургалтын баазад болж өнгөрлөө.

Дэлхийн эрүүл мэндийн байгууллагын зөвлөх Др Мари Хондагийн заавар, зөвлөмжийн дагуу үндэсний сургагч багш нар гурван өдрийн турш явуулсан тус сургалтын гол зорилго нь нярайн эрт үеийн тусламжийг жилдээ 50-иас дээш төрөлтийг удирдан явуулдаг сум дундын эмнэлэг, сумын эрүүл мэндийн төвд нэвтрүүлэх, тусламж үйлчилгээний чанарыг сайжруулах, эх барихын эмч, эх баригч, нярайн эмч, сувилагч нарыг чадавхжуулах, улмаар сэргийлэх боломжтой нярайн эрт үеийн эндэгдэл, өвчлөлийг бууруулахад оршино.

Сургалтын үеэр оролцогч нар эрсдэлтэй болон бүх эх, нярайд үзүүлэх нярайн эрт үеийн нэн шаардлагатай тусламж, үйлчилгээний талаар мэдлэг, мэдээлэлтэй болж, нярайг хуурайшуулах, эхтэй нь арьс арьсаар шүргэлцүүлэн тэврүүлэх, эхтэй тогтмол харилцаатай байх зэрэг олон үйлдэл, үйлчилгээний ач холбогдлыг олж мэдлээ.

Практикт суурилсан арга зүйн үр дүнд оролцогч нар онолын мэдлэгээс гадна төрөхийн өмнө болон дараах тусламж, үйлчилгээ үзүүлэхэд шаардлагатай ур чадварыг эзэмшиж, бүх үйлдлийг шаардлагын дагуу ягштал гүйцэтгэж сурсан юм. Өрөөний дулааны хэмийг шалгахаас эхлээд гараа угаах, нярайг хуурайшуулах, хөхөхөд бэлэн болсон шинжүүдийн талаар эхэд зөвлөгөө өгөх гээд бүх үйлдлийг оролцогч нар гардан гүйцэтгэсэн билээ. Түүнчлэн багш нар болон оролцогчдын дунд нээлттэй яриа, зөвшилцөл, асуулт  хариулт өрнөж байсан нь харилцан суралцах боломжийг бүрдүүлсэн юм.